2018-yil 20-fevral BuxDU huzuridagi XTXQTUMOHMda barcha xalq ta’limi muassalarida faoliyat ko‘rsatayotgan pedagog xodimlarning kasbiy faoliyat ko‘rsatkichlari portfolio talablari asosida hujjatlarini tayyorlash va uni tizimga joylashtirishda uslubiy amaliy yordam ko‘rsatish maqsadida “Masofadan o‘qitishni hududiy muvofiqlashtirish” bo‘limi tashabbusi bilan “Pedagogning portfoliosi” mavzusida o‘quv-amaliy seminar tashkil etildi.
Seminarda hududiy markaz direktori M.I. Daminov, o‘quv jarayonini tashkil etish bo‘limi boshlig‘i N.Jumaqulov, “Ilg‘or tajriba va xalqaro hamkorlik ilmiy-axborot tadqiqotlar” bo‘limi boshlig’i M.Oripova, professor-o‘qituvchilardan Sh.Murodova, G.Muqimova hamda kurs tinglovchilari ishtirok etdi.
O‘quv-amaliy seminarni hududiy markaz direktori M.I. Daminov kirish so‘zi bilan ochib, malaka oshirish kursi davomida tinglovchilar tomonidan xtxmom.bimm.uz saytiga o‘z kasbiy faoliyatida mustaqil malaka oshirish shakllaridan oxirgi 5 yil davomida erishgan natijalari hamda o‘z mutaxassisligi bo‘yicha tayyorlagan o‘quv, uslubiy va ilmiy faoliyatlari aks etgan materiallarining elektron shaklini joylashtirib, kerakli ball to‘planishi lozimligi, portfolio ko‘rsatkichlari tinglovchilarning o‘z ustida mustaqil ishlash samaradorligini qayd etib boruvchi tizim sifatida attestatsiya komissiyasida tegishli xulosalar qabul qilish uchun asos bo‘lib xizmat qilishini alohida qayd qilib o‘tdi.
Seminarda “Masofadan o‘qitishni hududiy muvofiqlashtirish” bo‘limi boshlig‘i A.Xasanov malaka oshirish kurs tinglovchilarining portfoliolarini baholash mezoni, portfolio necha bo‘limdan iborat ekanligi va qanday asosda baholanishi to‘g‘risida, bo‘lim xodimi Y.Salimova esa, tinglovchilarning portfolio hujjatlarini elektron variantini tayyorlashdan oldingi amalga oshiriladigan ishlar haqida, malaka oshirishga kelgan vaqtda o‘zlari bilan qanday hujjatlar olib kelishlari, bu hujjatlar nimalardan iborat ekanligi va qanday shaklda bo‘lishi haqida slaydlar asosida atroflicha ma’lumotlar berganligi o‘rinli bo‘ldi.
“Masofadan o‘qitishni hududiy muvofiqlashtirish” bo‘limi xodimi N.Hamidov
pf-xtxmom.bimm.uz saytidan foydalanish va portfoliolarni saytga yuklash uchun tayyorlangan elektron ma’lumotlar hajmining qancha bo‘lishi va katta hajmdagi ma’lumotlarni kichraytirish usullari bo‘yicha uslubiy tavsiyalar berdi.
Ishtirokchilar uchta kichik guruhga ajratildi, guruh a’zolari pedagog portfoliosining 3 ta bo‘limi: o‘quv-metodik, ilmiy tadqiqot va tashkiliy metodik faoliyatlar yuzasidan o‘z fikr-mulohazalarini taqdimot qildi. Bo‘limi boshlig‘i A.Xasanov guruhlar taqdimotini umumlashtirib, yakuniy xulosalar qildi va zaruriy ko‘rsatmalarni berib o‘tdi.
Seminar yakunida mavzu bo‘yicha tinglovchilar tomonidan berilgan savollarga o‘quv jarayonini tashkil etish bo‘limi boshlig‘i N.Jumaqulov, “Ilg‘or tajriba va xalqaro hamkorlik ilmiy-axborot tadqiqotlar” bo‘limi boshlig’i M.Oripovalar javob berib, kelajakda pedagog portfoliosi uchun kerakli hujjatlar to‘plami yaratib borish kerakligini ta’kidladilar.
O‘quv-amaliy seminar qizg‘in savol-javoblar asosida o‘tdi, mavzu bo‘yicha tayyorlangan taqdimotlarning elektron variantlari ishtirokchilarga taqdim etildi.
Tayyorladi: BuxDU huzuridagi XTXQTMOHM “Ilg‘or tajriba va
xalqaro hamkorlik ilmiy-axborot tadqiqotlar” bo‘limi
